«ALUMNI UZDIK»: қоғамға үлес қосқан 13 NIS түлегі марапатталды

2026 жылғы 12 шілдеде Астанада өткен Royal Legacy Ball кешінде Alumni NIS қауымдастығы жаңа «ALUMNI UZDIK» номинациясының алғашқы иегерлерін таныстырды. Марапат кәсіби жетістіктерін қоғамдық бастамалармен ұштастырып, Қазақстанда және халықаралық деңгейде білім, ғылым, технология, дипломатия мен әлеуметтік даму салаларына ықпал етіп жүрген түлектерге берілді.

«ALUMNI UZDIK» номинациясының иегерлері: Лаура Вайгорова: SmarTestPrep компаниясының CEO-сы әрі тең құрылтайшысы. Оның жұмысы нәтижесінде студенттер шетелде білім алуға арналған гранттар мен стипендиялар түрінде 5 млн АҚШ долларынан астам қаражат тартуға мүмкіндік алып, 5 400-ден астам оқушы жетекші шетелдік университеттерге түсті. 2025 жылы Лаура 5 000 оқушыға құны 105 мың АҚШ долларын құрайтын SmarTestPrep платформасына тегін қолжетімділік ұсынып, NIS қауымдастығын қолдады.

Сабыржан Мустафин: CYBERPACK.AI және Rolab Academy жобаларының негізін қалаушы әрі CEO-сы. Мектеп оқушыларына арналған қазақстандық AI-платформаны дамытуға 300 мың АҚШ доллары көлемінде инвестиция тартты. Rolab оқушылары робототехника бойынша республикалық және халықаралық жарыстарда жеңіске жетіп жүр. CYBERPACK.AI платформасы Қазақстан мен Әзербайжанның 65 мектебіне енгізіліп, оны 35 мыңнан астам оқушы пайдаланады. Камила Сакен: Қазақстанның 2 000-нан астам мектебіне енгізілген және мобильді қосымшасында 1 млн-нан астам пайдаланушысы бар weglobal.ai платформасының, сондай-ақ ауылдық өңірлердегі 170 оқушыға ағылшын тілін тегін үйрететін MentorsHub жобасының тең құрылтайшысы. Бірнеше жылдан бері әлеуметтік осал топтардан шыққан NIS оқушыларына SAT емтиханына толық дайындалуға гранттар ұсынып келеді.

Ернур Акжол: Қазақстандағы SAT және IELTS емтихандарына даярлау бойынша жетекші компаниялардың бірі — Master Education-ның негізін қалаушы. Жыл сайын NIS оқушыларына арналған білім беру гранттарына шамамен 8 млн теңге бөліп, SAT-қа толық дайындық пен университетке түсу үдерісінде сүйемелдеу ұсынады. Компания бірнеше жылдан бері Қазақстанның дарынды оқушыларына әлемнің жетекші университеттеріне түсуге көмектесіп келеді.

Шолпан Аржан: Дипломатиялық миссиялардағы қызметінде БҰҰ атынан өкілдік етіп, Шығыс Еуропа мен Балқан елдеріндегі халықаралық миссияларға қатысты. Азаптау мен қазіргі заманғы құлдық түрлерінің құрбандарына көмектесетін 120-дан астам елдегі үкіметтік емес ұйымдарға гранттық қолдауды үйлестірді. Сондай-ақ Атом энергиясы жөніндегі халықаралық агенттікте (МАГАТЭ) және БҰҰ-ның Женевадағы штаб-пәтерінде адам құқықтарын қорғау саласында жұмыс істеді. Зейнур Уали: FIRST World Championship 2026 халықаралық төрешілер алқасының құрамына енген Қазақстанның алғашқы өкілі. 2024 жылдан бастап Қазақстан мен БАӘ-де өткен робототехника турнирлерінде төреші, комментатор және ұйымдастырушы болып жұмыс істеп, кейін Хьюстондағы әлем чемпионатының қазылар алқасына шақырылды.

Асель Амангелді: Harvard Graduate School of Education түлегі және толық грант иегері, Harvard Teacher Fellow. АҚШ мектептеріне арналған AI-шешімдер әзірлейтін Predictive Learning Insights EdTech-компаниясының тең құрылтайшысы әрі президенті, сондай-ақ 30 мыңнан астам студент білім алған TILU платформасының негізін қалаушы. Жыл сайын ауыл оқушыларына жалпы сомасы 4,5 млн теңге болатын 20 білім беру грантын ұсынып, халықаралық білімге қолжетімділік пен EdTech инновацияларын дамытып келеді.

Меруерт Бижанова: 24 жасында Оксфорд университетінің докторанты әрі оқытушысы атанды. Пенсильвания университетінің 284 жылдық тарихында Penn Global Citizenship Award сыйлығын алған алғашқы қазақстандық әйел. Graduate & Professional Student Assembly (GAPSA) президенті ретінде University of Pennsylvania-дағы 20 мыңнан астам магистрант пен докторанттың мүддесін қорғады. Жоғары білім және халықаралық білім беру саясаты саласындағы зерттеулер арқылы Қазақстанды әлемдік академиялық кеңістікте танытып жүр.

Асель Ибадулла: Стэнфорд университетінің Knight-Hennessy Scholars бағдарламасының стипендиаты атанған алғашқы қазақстандық әйел; грант құны шамамен 350 млн теңгені құрайды. Harvard T.H. Chan School of Public Health ғылыми қызметкері және медициналық технологияларды модельдеу бағыты бойынша Стэнфорд докторантурасына толық грант алған екі шетелдік студенттің бірі. Mind Matters және студенттерге жетекші университеттерге түсуге көмектесетін Aspire Admissions білім беру мектебінің негізін қалаушы. Forbes Kazakhstan журналының «30-ға дейінгі 30» тізіміне енген.

Назгүл Сәкенова: Harvard Medical School постдокторанты, биомедицина және антибиотиктерге төзімділік саласының зерттеушісі. Ғылыми жұмысына 234 мың АҚШ доллары көлеміндегі зерттеу грантын иеленіп, 600-ден астам үміткер арасынан Гарвардтың беделді бағдарламасына таңдалған 25 ғалымның қатарына енді. Harvard Medical School-да студенттер мен жас зерттеушілерге тәлімгерлік етеді және антибиотиктерге төзімділікпен күресуге бағытталған зерттеулер жүргізеді. Ерболат Ниятбай: NIS түлектері арасынан Назарбаев Зияткерлік мектептері жүйесінде мектеп директоры болып тағайындалған алғашқы түлек. Оқушыларды Еуропаның жетекші университеттеріне түсуге мүмкіндік беретін DSD неміс тілі дипломына даярлауды қоса алғанда, халықаралық білім беру бағдарламаларын дамытады. Академиялық көшбасшылыққа, халықаралық ынтымақтастыққа және озық әлемдік тәжірибеге сүйене отырып, оқушылардың халықаралық олимпиадаларға, зерттеу жобаларына және жетекші университеттерге түсуіне жағдай жасайды.

Алинур Джаболдинов: Hamilton College-ге 91 мың АҚШ доллары көлеміндегі толық грантпен түскен алғашқы қазақстандық. MIT зерттеушісі ретінде әлемнің жетекші зертханаларының бірінде қатерлі ісіктің терапияға төзімділік механизмдерін зерттейді. АҚШ пен Австралияның ғылыми орталықтарында онкология және вакцинология бағыттарындағы жобаларға қатысып, қазіргі емнің тиімділігін арттыра алатын жаңа тәсілдерді әзірлеумен айналысады.

Альмухамед Амитов: 10-нан астам елде 20-дан астам корпоративтік клиенті және 100 мыңнан астам пайдаланушысы бар KOZ AI компаниясының CEO-сы. AI SANA байқауының «Жасанды интеллект саласындағы жыл көшбасшысы» және «Денсаулық сақтау саласындағы үздік AI-жоба» номинацияларының жеңімпазы. Онкологиялық ауруларды ерте диагностикалауға арналған OncoZero.AI жүйесін әзірледі; жоба NURIS Demo Day және ITFEST байқауларында жеңіске жетіп, Hult Prize Dubai жарысында 10 мың команданың ішінен үздік екілікке енді. AI-білім беруді дамытуға үлес қосып, әскери қызметі кезінде қорғаныс саласына арналған AI-шешімдерді әзірлеп, ел басшылығы мен Қорғаныс министріне таныстырды.

«ALUMNI UZDIK» номинациясы түлектер жетістігін атап қана қоймай, NIS қауымдастығындағы білімді қоғам игілігіне жұмсау, көшбасшылық таныту және кейінгі буынға жол ашу құндылықтарын айқындайды.