Бекин Омар

Қазақстандағы «Халық алғысы» медалінің ең жас иегері – Көкшетаулық 17 жастағы волонтер

КӨКШЕТАУ. ҚАЗАҚПАРАТ – Қазақстандағы «Халық алғысы» медалінің ең жас иегері – Көкшетау қаласының 17 жастағы волонтері Омар Бекин. Оны айналасындағыларға көмектесуге не жетелегені және алдағы жоспарлары туралы жас волонтер «ҚазАқпарат» тілшісіне айтып берді.

Қазіргі таңда Омар Көкшетау қаласындағы Назарбаев Зияткерлік мектебінің 12-сыныбында оқиды. Сабақ үлгерімінде ешқандай мәселе жоқ. Ол информатика, математика және бағдарламалауға қызығады. Ал бос уақытының барлығын айналасындағыларға көмектесуге арнайды.

«Мен 10-сыныпта оқып жүрген кезімде мектебімізде жастармен кездесулер өтетін. Бізге түрлі ұйымдардың өкілдері, соның ішінде «Думан» педагогикалық жасағының мүшелері де келетін. Жалпы, қоғамдық қызметке деген алғашқы қадамым дәл осы жасақтан басталды. Мен сол жерге барып, тәлімгер болу бойынша дайындықтан өттім және өткен жаздың барлығын балалар лагерлерінде өткіздім. Ал 2019 жылдың қыркүйек айынан бастап волонтерлік қызметке қызығушылығым арта түсті. «Jas Otan» жастар қанатына қосылдым, содан бері сол ұйымның қатарындамын», – деді Омар «ҚазАқпарат» тілшісіне.

Олардың атқаратын жұмыстарының ауқымы өте кең. Үйін жинауға немесе дүкенге баруға мүмкіндігі жоқ қарт адамдарға көмектесуден бастап, денсаулығында мәселелері бар балаларға қолдау көрсетуге дейін түрлі жұмыстар атқарылады. Жастар «Қамқор» арнайы жобасын жүзеге асырып, оның аясында медициналық-әлеуметтік мекемелерге барып, кәмелетке толмағандарды бейімдеу орталығына да көмектеседі.

«Өкінішке қарай, карантин кезінде бұл жұмыстардың барлығы тоқтап қалды. Бірақ мүмкіндік туған кезде бұл тәжірибені қайта жалғастырамыз деп ойлаймын. Сонымен қатар, біз қала көшелерін жиі тазалаймыз. Жеке өзім НЗМ-дегі достарыммен бірге мектебіміздің маңындағы ауланы тазалаған кезім болды. Біз ол жерден жиі өтетінбіз және айналаның лас екенін байқайтынбыз. Бір күні тұрғындарға үлгі болу үшін сол жерді өзіміз тазалап тастауды шештік», – деп жалғастырды волонтер.

Бүгінде Омар – «Nur Otan» партиясы жанындағы «Jas Otan» жастар қанатының Көкшетау қалалық бөлімшесінің жетекшісі, Ақмола облыстық «Думан» педагогикалық жасағының аға тәлімгері және Қазақстан жас патриоттары академиясының мүшесі.

Жақында Қазақстан Республикасының Президенті Қасым-Жомарт Тоқаевтың Жарлығымен ол «Халық алғысы» медалімен марапатталды.

«Мені осы марапатқа ұсынатындарын айтқан сәт әлі есімде. Мен партияға жай ғана бір нәрсеге көмектесу үшін барған едім. Сол кезде менен жеке мәліметтерімді сұрай бастады. Алғашында мұны аса маңызды нәрсе деп ойламадым. Бірақ бұл медальді Қасым-Жомарт Тоқаевтың табыстайтынын айтқанда, қатты таңғалдым әрі ыңғайсызданып қалдым. Өйткені волонтер ретінде еңбек етіп жүрген жастар өте көп. Бірақ қандай да бір себеппен мені және тағы үш адамды марапатқа ұсынды. Мұндайды күтпедім. Себебі мен волонтер ретінде өзім үшін, ешқандай марапат күтпей жұмыс істеп жүрмін деп есептейтінмін», – дейді Омар.

Дегенмен бұл – жас жігіттің жалғыз марапаты емес. Коронавирус пандемиясы кезінде атқарған еңбегі үшін ол Қазақстанның Тұңғыш Президенті Н.Ә. Назарбаевтың Алғыс хатына және партияның Ақмола облыстық филиалы төрағасының бірінші орынбасары Ғалым Бекмағамбетовтің Алғыс хатына ие болған.

Омар «Елбасы» бастамасымен «Біз біргеміз» акциясы басталған кезде бірнеше ай бойы күн сайын азық-түлік пен қажетті заттарды жеткізу жұмыстарына қатысқан. Оның өзі 500-ден астам қорапты тұрғындарға жеткізген.

«Өмірімнің мақсатын былай анықтар едім: әлемді жақсы жаққа өзгерткім келеді. Бұл өте ауқымды естілетінін білемін. Әзірге қай оқу орнына түсетінімді нақты білмеймін. Егер шетелде білім алсам да, міндетті түрде елге ораламын. Мұны өзім үшін анық шешіп қойдым. Жақсы білім алып, басқа елдердің тәжірибесін Қазақстанның дамуына пайдаланғым келеді. Қазір екі бағытты қарастырып жүрмін: халықаралық қатынастар немесе информатика. Дегенмен саяси қызметке көбірек бейім сияқтымын», – дейді Омар.

Жас волонтердің айтуынша, бүгінгі жетістіктеріне ата-анасының дер кезінде қолдау көрсетіп, бастамаларына сенім білдіруі, сондай-ақ оның тәлімгері – «Jas Otan» жастар қанаты Ақмола облыстық филиалының төрағасы Сұлтанбек Бекешевтің ықпалы зор болған.

«Біреуге көмектескен кезде сезінетін эмоцияны сөзбен айтып жеткізу мүмкін емес. Бұл жай ғана қуаныш немесе қанағат сезімі емес. Ішіңді жылытатын ерекше бір сезім пайда болады. Қарапайым ғана әрекетің арқылы басқа адамның өмірін әлдеқайда жақсы ете алғаныңды түсінесің. Мүмкін, ол адам да осыдан кейін қандай да бір нәрсеге деген көзқарасын өзгертетін шығар.

Барлық оқырманға бір өтінішім бар. Қазір еліміз үшін өте қиын кезең. Бірақ айналасындағыларға көмектесуге мүмкіндігі бар, ықпалды адамдар көп. Неге сол көмекті көрсетпеске? Елбасы айтқандай, «Біз біргеміз». Біз бірге болсақ, кез келген қиындықты жеңу әлдеқайда оңай. Қандай да бір жолмен көмектесуге тырысып жүрген адамдарды сынаудың немесе сөз етудің қажеті жоқ. Жағдайға әр қырынан қарауға тырысып, егер мүмкіндігіңіз болса, волонтер болуға ұмтылыңыз», – деп сөзін қорытындылады Омар.